Aflýst ! Herðubreið þegar gott veður gefst

Uppfært 5. júlí 2022: 

Aflýsum þessari göngu vegna lítillar þátttöku því miður, eingöngu átta manns búnir að staðfesta.

Aðstæður á svæðinu eru reyndar ekki spennandi núna og eins og sumarið hefur þróast í kulda og úrkomu þá er besti tíminn til að ganga á Herðubreið frá miðjum ágúst í ár, svo við bara sjáum hvað setur, við Örn erum til í þetta fjall síðar ef nægur áhugi gefst, sendið þá bara inn áskorun á hópinn þar sem mjög margir i klúbbnum voru ekki í mergjuðu ferðinni okkar á Herðubreið árið 2008 🥰

Sendið reikningsnúmer á Örn til að fá endurgreitt þið sex sem voruð búin að greiða eða meldið hér undir ef þið viljið eiga inneign. Erum að fljúga frá Finnlandi í dag, hann kemst í þetta á morgun !

Fyrir þá sem vilja endilega ná þessu fjalli í sumar þá er FFA eða Ferðafélag Akureyrar með árlega göngu þarna upp um miðjan ágúst auk þess sem FÍ er með ferð næstu helgi ofl. svo vonandi náið þið þessu, þið sem eigið Herðubreið alltaf eftir 🥰🥰

Við verðum þá með þriðjuæfingu í næstu viku úr því þessi ferð fellur niður og erum með nokkrar spennandi fjallgöngur í sigtinu ef veður leyfir næstu tvær vikurnar og þar næstu tvær helgar, sendum þá út könnun um áhuga á lokaða fb-Toppfarahópinn og fórum ef við náum 10 - 15 manna lágmarksþátttöku eftir því hvaða fjall um ræðir.

Knús og takk fyrir staðfestuna þið sem voruð alltaf ákveðin í að fara, hlakka til að heyra ef þið náið þessu fjalli í sumar ❤️❤️❤️

Skráðir eru 8 manns : Arna, Fanney, Guðmundur Jón, Jaana, Jóhann Smári gestur, Katrín Kj., Kristín Leifs., Njáll og þjálfarar. 

Því miður eru ekki fleiri skráðir í þessar ferð og það vantar ennþá 7 manns til að hún verði farin. Við ætlum að meta þetta endanlega 4. júlí og taka þá ákvörðun út frá þátttökufjölda (lágmarksfjöldi er 15 manns NB) svo allir geti gert aðrar ráðstafanir. Margir hafa lýst yfir áhuga en ekki staðfest og við skiljum það vel, vilja láta þetta fljóta þar til nær dregur í fríinu sínu, en passið allir sem eru á að spá í að koma með að vera búnir að ákveða sig og greiða í síðasta lagi 4. júlí þar sem við ætlum að breyta um fjall ef við náum ekki 15 manns fyrir þann dag.

Til vara eru Kristínartindar í Skaftafelli, Hágöngur á Sprendisandi eða álíka kyngimögnuð fjöll út frá veðri og/eða þátttökufjölda, ef ske kynni að fleiri vilji fara á þau þar sem ferðalagið er ekki eins flókið og bílfæri betra fyrir alla - eða ef veðrið verður erfitt þá endum við kannski á Hlöðufelli, Prestahnúk eða álíka spennandi hálendisdagsferðum frá Reykjavík ef gefur á veður og nægur áhugi er.

Jeppar líklega 3:  Guðmundur Jón, Njáll og Örn.

Þeir sem þurfa jeppafar koma upp í frá þjóðvegi 1 að morgni göngudags miðað við gistingu fyrir göngu í byggð - eða ef menn komast inn að Herðubreiðarlindum sjálfir og gista þar, þá frá þeim að fjallinu á morgni göngudags - nema menn sameinist í jeppa frá Reykjavík auðvitað, hver og einn jeppi stjórnar því. Eingöngu jeppar keyra að fjallinu NB, ekki jepplingar, en jepplinga geta komist inn eftir að Herðubreiðarlindum ef árnar eru vatnslitlar, við munum heyra í skálavörðum þegar nær dregur ferð með þetta.

Hámark 20 manns, lágmark 15 manns. 

Nýjustu tilkynningar:

*Hjálmur nauðsynlegur búnaður allra án undantekningar vegna grjóthrunshættu sem er raunveruleg á leiðinni. Keðjubroddar, jöklabroddar og ísexi einnig nauðsynlegur búnaður allra ef snjóskaflar eru harðir efst í brattanum.

*Tímarammi þessarar ferðar er frá mánudegi 18. júlí til og með laugardegi 23. júlí. Mögulegir göngudagar eru þri 19/7 - fös 22/7 þar sem mán 18/7 fer þá í akstur austur og laug 23/7 í akstur aftur í bæinn.

Þessi rammi miðast við að Bára þjálfari er á næturvöktum helgarnar í kringum þessa viku, ég lagði ekki í að skipta þessum vöktum með miklu flækjustigi þar sem óvíst er hvort af þessari ferð verður vegna lítillar þátttöku.

*Athugið að þar sem leiðin er erfið þó stutt sé í viðvarandi grjóthrunshættu þá ætlum við að hafa algert hámark 20 manns í þessa göngu. Lágmarksþátttaka er 15 manns. Förum eingöngu ef við náum 15 manna þátttöku, margir hafa áhuga á þessari ferð en eru ekki búnir að festa pláss, vonum það besta þegar nær dregur ferð með þátttökufjölda.

*Athugið vel að ferð er ekki endurgreidd við afboðun eftir 1. júní nema annar komi í staðinn.

*Hver og einn sér um sína gistingu, í Herðubreiðarlindum, Dreka eða Mývatni eftir því hvað hentar. Hver og einn hefur þetta eins og honum hentar með ferðalag norður og gistingu. Við sameinumst í jeppa frá þjóðvegi 1 inn að Herðubreiðarlindum að morgni göngudags, þar sem þeir sem ekki eru á jeppum koma upp í, en endilega gistum saman ef við getum fyrir og eftir göngu þeir sem vilja það. Borðum saman eftir gönguna við Herðubreiðarlindir NB og keyrum í samfloti norður og aftur heim eftir göngu þeir sem vilja (3 dagar alls með akstri og göngu lágmark). Þjálfarar tjalda við Herðubreiðarlindir eða gista á Mývatni líklegast, fer eftir því hvaða dagur verður fyrir valinu. 

*Eingöngu jeppar fara í þessa ferð (ekki jepplingar) þar sem malbiki sleppir. Fara þarf yfir tvær ár að Herðubreiðarlindum (sjá nánar síðar færið) og aksturinn frá Herðubreiðarlindum að Herðubreið sjálfri er krefjandi fyrir alla jeppa þar sem við munum hugsanlega þurfa að leggja bílum fyrr og ganga hluta af veginum að fjallinu. 

Verð:

Kr. 18.000 fyrir klúbbmeðlimi sem mættu í tindferð síðustu 2 mánuði eða ef bæði hjón/par/vinir mæta.

Kr. 20.000 fyrir klúbbmeðlimi ef ofangreindur afsláttur gildir ekki.

Kr. 22.000 fyrir gesti sem vilja prófa göngu með klúbbnum.

Greitt beint inn á reikning Toppfara ehf: 0114-26-58100. Kt: 581007-2210 eða með símgreiðslu á kreditkorti:

Örn í síma: 899-8185 og Bára í 867-4000 og tölvupóst orn-bokari(hjá)simnet.is eða baraket(hjá)simnet.is.

Skráning og skilmálar:

Skráning eingöngu gild með greiðslu. Þeir sem eiga inneign meldi það inn eða sendið okkur skilaboð / póst. 

Ferð er ekki endurgreidd við afboðun ef uppselt er í ferðina og fólki var vísað frá sem vildi skrá sig eða ef fáir voru skráðir og ferð hefði verið aflýst vegna ónógrar þátttöku.

Veðurspár:

Sjá www.vedur.is Skoðið staðaspár og veðurþáttaspár til að fá betri yfirsýn yfir vind, úrkomu og hita á svæðinu. Textaspá er réttari en myndaspá. www.belgingur.is er stundum nákvæmari. Sjá norska veðurspávefinn þar sem hægt er að skoða langtímaspá, helgarspá og klukkutímaspár, en taka þarf með í reikninginn að um fjallllendi er að ræða þar sem önnur lögmál gilda en á láglendi og oft er hæðartala á þessum vef röng:  

Leiðsögn:

Þjálfarar.

Brottför:

Kl. 8:00 á slaginu frá þjóðvegi 1 við afleggjarann inn að Herðubreiðarlindum eða á þeim tíma sem veðurspáin er best, hugsanlega fyrr um morguninn eða seinna um daginn ef spáin er slík en hún ræður för. Hver og einn keyrir norður þegar hentar en verum í samfloti keyrandi norður þegar nær dregur, þeir sem vilja. 

Aksturslengd:

Um 20 km á 1 klst. frá skála að fjallsrótum mjög seinfarna og krefjandi jeppaleið um hraunbreiður þar sem hugsanlega þarf að skilja bíla eftir og ganga afganginn að fjallsrótum og um 10 - 12 klst. á 560 km frá Reykjavík að Herðubreiðarlindum með stoppum. 

Brottfararstaður Reykjavík | vegalengdakerfi | Vegagerðin (vegagerdin.is)

Akstursleiðarlýsing:

Ekið um þjóðveg eitt norður til Akureyrar og áfram norðaustur um Fljótsheiði að Öskjuleið inn að Herðubreiðarlindum. Malbik alla leið nema síðustu 60 km. Alls tæpir 560 - 600 km. 

Hæð:

Um 1.700 m.

Hækkun:

Um 1.050 m miðað við 680  m upphafshæð en fer endanlega eftir leiðarvali, veðri, færð og hópi.

Göngulengd:

Um 7 - 13  km og ræðst af því hversu langt við náum að fara á jeppunum en fer endanlega eftir leiðarvali, veðri, færð og hópi. 

Göngutími:

Um 6 - 9 klst. en fer endanlega eftir leiðarvali, veðri, færð og hópi.

Gönguleiðin:

Mjög brött leið frá upphafi á sjáanlegum stíg til að byrja með í lausum sandi og grjóti, en ofar þarf að velja góða leið eftir færi hverju sinni þar sem hafa þarf hópinn þéttan saman og þvera hlíðina efst og gæta vel að grjóthruni (allir saman í röð og enginn á undan eða á eftir að þvera hlíðina). Uppi á fjallinu er svo greiðfært alla leið á tindinn. 

Erfiðleikastig:

Um 3 af 6 eða fært öllum í góðu gönguformi fyrir krefjandi fjallgöngu þó stutt sé þar sem gönguhraði er hægur vegna bratta og erfiðrar yfirferðar í einni langri brekku upp þar sem gæta þarf varúðar vegna grjóthruns.

Búnaður:

Sjá upptalningu undir búnaður - farið vel yfir listann og passið að hafa allan tindferðabúnað meðferðis, góða skó, hlý föt, góðan hlífðarfatnað, vettlinga og höfuðfat og höfuðljós.

Tryggingar:

Þátttakendur eru ekki tryggðir í göngunum og er bent á tryggingarfélögin í þessu sambandi. Toppfarar ehf tryggir hvorki þátttakendur né farangur þeirra. Þátttakendur ferðast á eigin ábyrgð og eru því hvattir til að kanna með eigin tryggingar.

Sjá fb-viðburð hér:  (15) Herðubreið þegar gott veður gefst | Facebook