top of page

Kveðja, Svavar Svavarsson.

F. 15. nóvember 1959. D. 14. október 2023.


Við kveðjum í dag kæran, fyrrum göngufélaga fjallgönguklúbbsins, hann Svavar Svavarsson, sem lést þann 14. október síðastliðinn.


Svavar gekk með okkur á fjöll í átta ár og fór í ótal sögulegar fjallgöngur með okkur, en var orðinn sárkvalinn í hnénu í síðustu göngunum og hætti vegna hnémeiðsla fyrir tæpum tveimur árum.


Hann bauð okkur ferðafélögum sínum í bústað sinn, Skálm í Álftaveri á Suðurlandi, í 2ja daga ferð á Lómagnúp og Kristínartinda árið 2018, og þar sýndi hann okkur sinn fallega sælureit sem hann kom sér upp síðustu ár og var honum augljóslega mjög kærkominn.


Það var sérlega gaman að ræða við hann um það ævintýri allt og fylgjast með ferlinu frá því hann ákvað fyrst að reisa sér þennan bústað, valdi stærð og gerð og þar til hann var fullbúinn. Dálæti hans á staðnum leyndi sér ekki og fangaði hug hans allan á hátt sem þau okkar í klúbbnum skildum svo vel, sem gengið höfum í gegnum álíka uppbyggingu.


Svavar var traustur og viðræðugóður göngufélagi og lét ekki sitt eftir liggja í hreinskilnum umræðum um menn og málefni, en þennan eiginleika mátum við mikils í fari Svavars þar sem fjörlegar umræður fara oft á flug þegar gengið er klukkustundum saman í óbyggðunum og þá er fengur í innihaldi, einlægni og dýpt.


Svavar var hjálpsamur og tryggur félagi klúbbsins sem okkur þótti vænt um og við mátum félagsskap hans og nærveru mikils.


Við minnumst hann með söknuði, þakklæti og virðingu. Fyrir hönd klúbbfélaga vottum við fjölskyldu Svavars okkar innilegustu samúð. Blessuð sé minning góðs drengs og kærs göngufélaga.



Ljósmyndir valdar af handahófi úr safni þjálfara úr eftirfarandi göngum:


Gráuhnúkar snúið við vegna veðurs og farið á Helgafell í Mosó 14. mars 2017: Allar þriðjudagsæfingar frá janú (toppfarar.is)


Gönguskíðanámskeið í Bláfjöllum 29. mars 2016: Þriðjudagsæfingar frá janúar út (toppfarar.is) Kirkjufell 6. júní 2015: Kirkjufellið loksins í safnið (toppfarar.is)


Kristínartindar 22. júlí 2018: Tindferð 159 Kristínartindar 22 (toppfarar.is)


Kristjánsdalahorn og Þríhnúkar 3. nóvember 2015: Allar þriðjudagsæfingar frá októ (toppfarar.is)


319 views0 comments

Comments


bottom of page