Grænihryggur öðruvísi um Barm og Hrygginn milli gilja kyngimagnaða leið.

Uppfært 22. júlí: 

Skráðir eru 20 manns:  Aníta, (Auður gestur), Bergþóra Jónsdóttir gestur, Ása, Doddi, Gulla, (Hildur Ágústa gestur), (Inga Guðrún), Inga Lilja gestur, Jaana, Kolbeinn, Maggi, Njóla, Olav Tombre gestur, Siggi, Sighvatur, Sigrún Bjarna, Sigurður Skafti Davíðsson, Sjöfn Kr.+ Örn þjálfari.

Laus 4 pláss.

Fjórhjóladrifnir bílar komast upp eftir svo við röðum bara í bíla við Össur en gott að vita hverjir ætla að keyra, meldið inn á fb-viðburðinn. 

Örn tekur Anítu, Jöönu og Sigga í sinn bíl frá Össuri.

Nokkrir á jeppa, jepplingi eða fjórhjóladrifnun bílum koma í þessa ferð svo við röðum í bíla við Össur á laugardagsmorgninum.

Lágmark 10 manns, hámark 25 manns. 

Nýjustu tilkynningar:

*Jepplingar komast þessa leið og fjórhjóladrifnir bílar. 

*Þetta er óhefðbundin leið sem við bjuggum til árið 2016 þar sem við prófuðum að fara upp á Barm sem er fallegi, langi og stóri hryggurinn sem umlykur Jökulgilið að austan og fórum þaðan niður í Jökulgilið þar sem vaða þarf Sveinsgilskvíslina til að komast að Hryggnum milli gilja. Sá hryggur er mikið ævintýri sem skákar Grænahrygg að okkar mati en þegar komið er að honum er farin hefðbundin leið um Sveinsgil og Halldórsgil til baka sem gefur aðra sýn á svæðið svo þessi hringleið er mögnuð og sjaldan farin svona. 

*Taka þarf vaðskó og þurrklút til að vaða Sveinsgilskvísl í Jökulgili og í Sveinsgili (saklaus vöðun en þó köld og grýtt). 

*Þetta er langur dagur en ólýsanlegt ævintýri eins og allar okkar fyrri ferðir um Fjallabakið. Hreint út sagt stórkoslegt landslag frá upphafi til enda ! 

*Höfum laugardag og sunnudag sem mögulegan göngudag og nauðsynlegt að melda inn við skráningu ef menn komast ekki alla þessa daga til þess að fá endurgreitt ef þeir komast ekki þann dag sem verður valinn.

*

Verð:

Kr. 7.000 fyrir klúbbmeðlimi sem hafa mætt 2svar í tindferð á síðustu 2 mánuðum.

Kr. 10.000 fyrir klúbbmeðlimi sem mættu í eina tindferð síðustu 2 mánuði eða ef bæði hjón/par/vinir mæta.

Kr. 13.000 fyrir klúbbmeðlimi ef ofangreindur afsláttur gildir ekki.

Kr. 16.000 fyrir gesti sem vilja prófa göngu með klúbbnum.

Greitt beint inn á reikning Toppfara ehf: 0114-26-58100. Kt: 581007-2210 eða með símgreiðslu á kreditkorti:

Örn í síma: 899-8185 og Bára í 867-4000 og tölvupóst orn-bokari(hjá)simnet.is eða baraket(hjá)simnet.is.

Skráning og skilmálar:

Athugið að við viljum helst alltaf endurgreiða við afboðun þó það sé með stuttum fyrirvara, en þó er ferð ekki endurgreidd við afboðun ef uppselt er í ferðina og fólki var vísað frá sem vildi skrá sig eða ef fáir voru skráðir og ferð hefði verið aflýst vegna ónógrar þátttöku.

Veðurspár:

Sjá www.vedur.is Skoðið staðaspár og veðurþáttaspár til að fá betri yfirsýn yfir vind, úrkomu og hita á svæðinu. Textaspá er réttari en myndaspá. www.belgingur.is er stundum nákvæmari. Sjá norska veðurspávefinn þar sem hægt er að skoða langtímaspá, helgarspá og klukkutímaspár, en taka þarf með í reikninginn að um fjallllendi er að ræða þar sem önnur lögmál gilda en á láglendi og oft er hæðartala á þessum vef röng.

Leiðsögn:

Þjálfarar.

Brottför:

Kl. 6:00 á slaginu frá Össur, Grjóthálsi 5.

Heimkoma:

Um kl. 21 - 22:00 miðað við 3 klst. akstur, 8 klst. göngu, græjun við bíla fyrir og eftir göngu og 1 klst. böðun/hvíld/viðrun eftir göngu í Landmannalaugum áður en haldið er heim á leið aftur.

Aksturslengd:

Um 3 klst.

Sameinumst í bíla og ökum í samfloti að fjallsrótum. Skiptumst á að skaffa bíl og fá far og deilum bensínkostnaði - viðmiðið er 1.500 kr. fyrir hvern hálftíma í akstri sem deilist niður á alla í bílnum (bílstjóri undanskilinn bensínkostnaði ef farþegar eru fleiri en einn). Endurskoðum reglulega þessa reglu frá FÍB og slípum hana til ef mönnum finnst þetta ekki rétt viðmiðunarupphæð.

Akstursleiðarlýsing:

Ekið um Suðurlandsveg að Landsvegamótum þar sem beygt er til vinstri og ekinn þjóðvegur 26 þar til beygt er til hægri Dómadalsleið inn á hálendi um veg F225 og Landmannaleið ekin í átt að Landmannalaugum, yfir Frostastaðaháls og niður í Jarðfallið en þar er beygt til vinstri í átt að Kýlingum (í stað þess að keyra í Landmannalaugar) og sá vegur ekinn á brú yfir Jökulgilskvísl og áfram meðfram Kýlingavatni að Kirkjufelli þar sem Halldórsgil liggur. Bílum lagt þar og lagt af stað.

Hæð:

Um 940 á Hryggnum milli gilja. 

Hækkun:

Um 1.300 m miðað við 573 m upphafshæð en fer endanlega eftir leiðarvali, veðri, færð og hópi.

Göngulengd:

Um 18 - 19  km en fer endanlega eftir leiðarvali, veðri, færð og hópi. .

Göngutími:

Um 8 klst. en fer endanlega eftir leiðarvali, veðri, færð og hópi.

Gönguleiðin:

Gengið um mjög fjölbreytt landslag upp grýttar og snarpar brekkur Barms (Austurbarms) þar sem Jökulgilið og Fjallabakið blasir skyndilega við frá nýju sjónarhorni en vanalega, stórskostlegur útsýnisstaður en þarna er bergið gult og allt svo fallegt og bjart. Farið niður ævintýralegan sandhrygg sem minnir á Uppgönguhrygg alla leið niður í Jökulgilið í horninu þar sem Sveinsgilið endar í því og því þarf að vaða Sveinsgilsána sem sameinast þarna Jökulgilskvíslinni. Forréttindi að vera á þessum stað og upplifa báðar árnar í návígi og vera yfirleitt kominn niður í hið kyngimagnaða Jökulgil. Farið upp úr gilinu um taglið á Hryggnum milli gilja sem er að öllum öðrum stöðum í Friðlandinu að Fjallabaki, uppáhaldsstaður okkar þjálfara því þessi hryggur er hreint ævintýri. Hann er genginn með heilmiklu brölti og klöngri inn eftir með Sveinsgilið á vinstri hönd og Jökulgilið á hægri hönd og Þrengslin og Grænahrygg framundan, fyrir utan að sjá yfir allt Friðlandið yfir á Hábarm, Torfajökul, Hrafntinnusker, Skalla og til Landmannalauga. Stórkostlegur staður að ganga um. Farið eftir öllum hryggnum þar til komið er að Þrengslunum sem njóta sín mjög vel ofan af Hryggnum milli gilja og dýrmætt að gefa sér góðan tíma hér til að njóta litanna og formanna í landslaginu. Farið niður að Grænahrygg og hann skoðaður ásamt Kanilhrygg áður en Sveingsgilskvíslin er vaðin en þá er komið inn á hefðbundinn gönguslóða að Grænahrygg og sá slóði genginn til baka í átt að Halldórsgili með mögnuðu útsýni yfir allt svæðið og Hrygginn okkar milli gilja þar til gangan endar síðasta kaflann um grýtt Halldórsgilið að bílunum svífandi í sæluvími eftir ólýsanlega fallegan dag. 

Erfiðleikastig:

Um 3 af 6 eða fært öllum í ágætis gönguformi fyrir frekar langa dagsgöngu um grýtt gil, sandaða hryggi og heimsfrægar jökulár að mestu í greiðfæru landslagi en þó ágætis klöngur á köflum í töfrandi fögru landslagi og útsýni allan tímann.

Búnaður:

Sjá upptalningu undir búnaður - farið vel yfir listann og passið að hafa allan tindferðabúnað meðferðis, góða skó, hlý föt, góðan hlífðarfatnað, vettlinga og höfuðfat og höfuðljós. 

Tryggingar:

Þátttakendur eru ekki tryggðir í göngunum og er bent á tryggingarfélögin í þessu sambandi. Toppfarar ehf tryggir hvorki þátttakendur né farangur þeirra. Þátttakendur ferðast á eigin ábyrgð og eru því hvattir til að kanna með eigin tryggingar.

Sjá fb-viðburð hér:  (20+) Grænihryggur öðruvísi um Barm og Hrygginn milli gilja kyngimagnaða leið. | Facebook