Ofurgöngurnar

Eftir að hafa látið gamlan draum rætast og ganga Laugaveginn á einum degi eða í raun einni nóttu árið 2020

var ekki aftur snúið... og þjálfarar ákváðu að fara eina svona Ofurgöngu á ári... þar sem gengin er 3ja daga gönguleið á einni nóttu... og upplifa þannig bjarta sumarnótt á hverju sumri... og fá sólarlag og sólarupprás beint í æð á göngu um miðja nótt...

​

Alls höfum við farið fjórar Ofurgöngur til þessa, hver annarri ólíkari og hver annarri magnaðri.

Reynslan af þeim öllum er fyrst og fremst sú að við getum meira en við höldum og að þetta er léttara en við gerðum ráð fyrir. Engu að síður er þetta mjög krefjandi og síðasti kaflinn sígur mjög vel í hjá öllum og þá reynir á að þola þreytu, verki og líkamlega vanlíðan þó mismikið sé milli einstaklinga og milli gangna hverju sinni. Dagsformið skiptir máli og undirbúningur skiptir höfuðmáli (með löngum dagsferðum mánuðina á undan) en það sem mest á reynir, er andlegt atgervi því maður þenur sál og líkama til hins ítrasta en þarf samt að halda áfram allt til enda sama hvað.

Jákvæðni, lausnamiðuð hugsun, trú á sjálfum sér og yfirvegun eru því mikilvægustu eiginleikarnir fyrir þessar Ofurgöngur

og hafi menn yfir þessum eiginleikum að búa, þá er þeim ekkert að vanbúnaði að koma með eða fara á eigin vegum með vandlegum undirbúningi... svo lengi sem þeir hafa æft vel og gengið reglulega mánuðum saman fyrir ferðina.

​

Við getum ekki nógsamlega mælt með þessum Ofurgöngum því þær gefa manni meira og annað en hefðbundnar gönguferðir... og þeir sem ganga á fjöll allt árið um kring árum saman... eiga skilið að upplifa einmitt þetta einstaka og öðruvísi en það hefðbundna og komast að því að þeir geta meira en þeir héldu...

​

Hér eru Ofurgöngurnar okkar í tímaröð... og samantekt á áhugaverðri tölfræði neðst.