Þríhyrningur - Föstudagsfjallið í mars = veisla !

Uppfært 16. mars 2023: 

Skráðir eru 6 manns; Bára, Fanney, Jaana, Sjöfn Kr., Þórkatla og Örn + báðir þjálfarar. 

Nýjustu tilkynningar:

*Staðfest brottför á fös 17/3, 6 manns staðfestir, sjáumst á Hvolsvelli kl. 9:15 eða við Össur kl. 8:00 og keyrum í samfloti upp eftir. Þetta verður friðsæll, hlýr og fallegur dagur. 

*Það stefnir í göngu á föstudag 17/3, mild og friðsæl veðurspá. Tökum ákvörðun á miðvikudagskvöld. 

*Þríhyrningur er föstudagsfjallið í mars og á þessa dagsetningu, Bjólfellið er ennþá ógengið sem febrúarfjallið og er á hliðarlínunni þegar aðrir föstudagar gefa á gott veður. 

*Gott að lesa um Föstudagsfjöllin hér:  https://www.fjallgongur.is/fostudagsfjollin

*Til að skrá sig (ef ekki í Toppförum) þarf að senda þjálfara tölvupóst en ekkert skráningargjald er í þetta föstudagsfjallgönguverkefni, eingöngu verð fyrir hverja göngu í senn. 

*Athugið að til vara eru föstudagarnir á undan þessum í febrúar (10/2 og 17/2) þar sem við munum hugsanlega nýta þá ef veðurspá er mjög góð og það er ekki Toppfaraferð á laugardegi þá helgi því gott veður er ekki sjálfgefið á þessum árstíma.

Verð:

Kr. 7.000 fyrir klúbbmeðlimi Toppfara og þá sem skráð hafa sig í Föstudagsfjallgönguhópinn með tölvupósti skv. leiðbeiningum hér: https://www.fjallgongur.is/fostudagsfjollin

Kr. 10.000 fyrir aðra en Toppfara sem ekki hafa skráð sig formlega í Föstudagsfjöllin með tölvupósti.

Greitt beint inn á reikning Toppfara ehf: 0114-26-58100. Kt: 581007-2210 eða með símgreiðslu á kreditkorti:

Örn í síma: 899-8185 og Bára í 867-4000 og tölvupóst orn-bokari(hjá)simnet.is eða baraket(hjá)simnet.is. 

Mjög mikilvægt er að skrifa í skýringu hvaða ferð er verið að greiða, nóg að setja nokkra stafi í nafni fjallsins svo skiljist.

Skráning og skilmálar:

Skráning eingöngu gild með greiðslu. Þeir sem eiga inneign meldi það inn eða sendið okkur skilaboð / póst. 

Athugið að við viljum helst alltaf endurgreiða við afboðun þó það sé með stuttum fyrirvara, en þó er ferð ekki endurgreidd við afboðun ef uppselt er í ferðina og fólki var vísað frá sem vildi skrá sig eða ef fáir voru skráðir og ferð hefði verið aflýst vegna ónógrar þátttöku.

Veðurspár:

Sjá www.vedur.is Skoðið staðaspár og veðurþáttaspár til að fá betri yfirsýn yfir vind, úrkomu og hita á svæðinu. Textaspá er réttari en myndaspá. www.belgingur.is er stundum nákvæmari. Sjá norska veðurspávefinn þar sem hægt er að skoða langtímaspá, helgarspá og klukkutímaspár, en taka þarf með í reikninginn að um fjallllendi er að ræða þar sem önnur lögmál gilda en á láglendi og oft er hæðartala á þessum vef röng: 

Yr - Þríhyrningur - Long term forecast

Leiðsögn:

Þjálfarar.

Brottför:

Kl. 8:00 á slaginu frá Össur, Grjóthálsi 5.

Heimkoma:

Um kl. 17:00.

Aksturslengd:

Rúmlega 1,5 klst. Fólksbílafært að sumri en betra að vera á hærri bílum að vetri til. Metum bílfæri þegar nær dregur ferð í samráði við heimamenn.  

Akstursleiðarlýsing:

Ekið um Suðurlandsveg með viðkomu í sjoppu á Hvolsvelli áður en tekin er svo vinstri beygja inn Fljótshlíðina og ekinn vegur F261 þar til beygt er til vinstri við Tumastaði og Vatnsdalur ekinn að Fiská þar sem bílum er lagt við ána og gengið þaðan af stað.

Hæð:

Um 695 m.

Hækkun:

Um 727 m miðað við 146 m upphafshæð en fer endanlega eftir leiðarvali, veðri, færð og hópi.

Göngulengd:

Um 8,5 km en fer endanlega eftir leiðarvali, veðri, færð og hópi. .

Göngutími:

Um 5+ klst. en fer endanlega eftir leiðarvali, veðri, færð og hópi.

Gönguleiðin:

Gengið upp á stíg sem nú er orðinn vel troðinn og komið upp á stórkostlegar brúnir fjallsins þar sem brúnirnar eru þræddar á góðri leið upp á fyrsta og hæsta tind fjallsins. Þaðan er stórkostlegt útsýni og þess virði að staldra vel við. Af honum er brölt einstaklega fallega leið eftir öllu fjallinu, upp og niður í grýttu og mosavöxnu landslagi að hluta á alla tindana þar sem stundum er hægt að þræða sig neðan við bestu brúnirnar eða velja að klöngrast meira og endað á innsta tindi fjallsins með Heklu í seilingarfjarlægð að manni finnst. Þaðan er farið greiðfærari leið til baka neðan við brúnirnar og komið við á ónefndu fjallsbungunni sem rís syðst í fjallinu í mjög fallegu og öðruvísi landslagi áður en komið er aftur á stíginn góða niður að bílunum.

Erfiðleikastig:

Um 2 af 6 eða fært öllum í sæmilegu gönguformi fyrir stutta dagsgöngu á stíg til að byrja með en svo ágætis og mjög gefandi brölti um hvassbrýnt en greiðfært fjall sem er einn besti útsýnisstaðurinn yfir á jöklana allt í kring, Vestmannaeyjar, Heklu og hálendið.

Búnaður:

Alltaf skal taka með sér vatns- og vindheldar buxur og jakka,  hlýtt höfuðfat, ullar- og belgvettlinga, ullarföt innst, góða gönguskó með ökklastuðningi, kjarngott nesti og 1-2 L af vökva eftir vegalengd og tímalengd ferðar. Höfuðljós og keðjurbroddar eru nauðsynlegur búnaður allra að vetri til og aðstæður gætu krafist notkun jöklabúnaðar og ísaxar sem er nauðsynlegur búnaður allra sem vilja almennt ganga á fjöll að vetri til. 

Tryggingar:

Þátttakendur eru ekki tryggðir í göngunum og er bent á tryggingarfélögin í þessu sambandi. Toppfarar ehf tryggir hvorki þátttakendur né farangur þeirra. Þátttakendur ferðast á eigin ábyrgð og eru því hvattir til að kanna með eigin tryggingar.