Níu tindar í Mosó á 31 km hringleið á 8 klst. á fallegum sumardegi

Tindferð nr. 336 laugardaginn 28. júní 2025

Fimmta Ofurgangan sem í ár var um Strútsstíg frá Hólaskjóli í Hvanngil var frestað í síðustu viku júní mánaðar... þri 24. - fös 27. júní... vegna veðurs... þar sem var spáð rigningu alla dagana á hálendinu og hvergi veðurglugga að fá... en laugardaginn eftir þessa... var sól og blíða... en þá komust ekki allir sem ætluðu Strútsstíg sem var alveg grátlegt því þannig náðum við ekki lágmarksþátttöku í rútuna sem var nauðsynleg til að geta farið Strútsstíg... og því urðum við að fresta henni fram til 6. - 10. ágúst... en þá náðist ekki heldur þátttaka og því varð ekkert úr ofurgöngunni árið 2025... og þjálfarar hétu sér því að vera aldrei háðir rútu og þar með lágmarksfjölda aftur í ofurgöngunni... því þá hefðum við t.d. aldrei upplifað að ganga kringum Langasjó á einni nóttu... en þar vorum við eingöngu sex manns...

Í svekkelsi yfir þessari frestun... eftir allan undirbúninginn... símtölin við rútufyrirtækið sem sýndi einstakan sveigjanleika og þolinmæði... eftir alla yfirleguna yfir veðurspám... í vinnunni þegar maður hafði ekki tíma og heima þegar maður hafði ekki hugann við annað en þessa gagan... og eftir allar vangavelturnar um leiðina.. osfrv... já, þetta voru mikil vonbrigði... þá ákvað þjálfari að bjóða upp á mjög langa göngu á fellin öll í Mosó... en enginn sýndi því áhuga nema Sjöfn Kristins... og úr varð að Bára ákvað að fara þó enginn mætti... af því þetta var gamall draumur og veðrið var of gott til að sleppa því...

Úr varð mögnuð ferð á níu tinda í blíðskaparveðri þar sem hundurinn Batman var sprækur sem lækur þrátt fyrir stóru kjálkaaðgerðina sína hálfu ári fyrr... og er þessi leið komin á kortið hér með og verður boðið upp á hana á næsta ári... sem tilvalda æfingu fyrir Ofurgöngurnar... og fyrir nördana sem elska fellin í Mosó... og finnst ekkert hallærislegt við það að ganga á þau öll saman í einni langri göngu...

Ég lagði af stað kl. 8:42 á laugardagsmorgninum í brakandi sól og blíðu... Úlfarsfellið var fyrsti tindur af níu...

Af Litla hnúk...

Fjöllin framundan... Hafrahlíð, Reykjaborg, Þverfell, Torfdalshryggur og Grímmannsfell... smá sést í Reykjafellið...

Helgafellið, Æsustaðafjallið og Reykjafellið... Fjær er Mosfell en ég sleppti því því það er ekki spennandi að þurfa að þvera þjóðveginn... en ég skal viðurkenna að ég lét mig dreyma að þetta yrði svo létt að ég myndi auðvitað "skella mér á Mosfellið" í leiðinni... en það fór ekki svo... þetta var nógu drulluerfitt... og mann langaði ekki baun þegar nær var komið Mosfelli... :-)

Komin niður Sólbakkaleiðina af Úlfarsfellinu og hér þarf að ganga veginn að Hafravatnsvegi og þaðan upp á Hafrahlíð... eini hluti allrar leiðarinnar sem er í byggð fyrir utan allra síðasta kaflann milli Helgafells og Úlfarsfells í lokin...

Hafravatnsvegurinn...

Tók myndir á hverjum tindi en var ekki farin að hugsa að gera það á Úlfarsfelli... svo þetta er fyrsta mynd af tímanum og vegalengdinni... á miðjum malbiksveginum milli Úlfarsfells og Hafrahlíðar...

Hafrahlíð framundan... ég fór stíginn beint upp í miðri hlíðinni...

Alls staðar lækir til að drekka... fyrir hundinn og mig...

En misgóðir...

Dísarhóll... farið um slóðann hér og gerðið og inn á göngustíg...

Upp Hafrahlíðina...

Úlfarsfellið úr hlíðum Hafrahlíðar...

Tindur tvö... Hafrahlíð...

Reykjaborgin næst...

Tindur þrjú, Reykjaborg...

Búin með 7,7 km á 1:49 klst...

Sýnin til baka á fyrstu tvö fellin...

Mosfellsbær... klárlega svalasti og ljúfasti bærinn á höfuðborgarsvæðinu... og sá eini sem hefur haft vit á því að hampa náttúrunni og dýralífinu... hann skammast sín ekki fyrir að vera "úthverfi"... Hafnarfjörður kemst kannski næst þessu líka... en alls ekki Reykjavík þar sem allt snýst um að hampa steinsteypunni og malbikinu og miðbænum... og ekki þykir góður bragur á því að búa í úthverfi og hvað þá vera stoltur af náttúrunni sem skreytir þau um allan jaðar borgarinnar... grátlegt satt best að segja og mikil sóun á auðlindum... en þökk sé Mosó er enn hægt að njóta náttúrunnar sem er samofin byggðinni með stolti og þakklæti...

Framundan... Þverfell, Torfdalshryggur og Grímmannsfell...

Þverfellið og Bæjarfellið með Bjarnavatni og Borgavatni...

Allir lækir nýttir :-)

Litið til baka á Reykjaborg...

Borgarvatn...

Þverfellið...

Þverfell... fjórði tindurinn af níu...

Búin með rúma 9 km á rúmum 2 klst...

Bjarnarvatn...

Hér áðum við í steikjandi hita og logni... svo mýið mætti strax... og ég færði mig yfir í goluna norðan megin við stífluna...

Sumarið... best í heimi...

Einfalt nesti... hlaupabakpoki látinn nægja í þessari ferð... og þá þurfti allt að komast í hann...

Hér komu erlend hjón með íslenskan fjárhund.. þeim fannst gaman að heyra á hvaða leið ég væri og könnuðust við sjö tinda hring Mosfellinga...

Alger friður... steinsnar frá byggð... hvílík verðmæti...

Hér var kona í fuglaskoðun... ég ræddi ekki við hana, hún var upptekin...

Útsýnið yfir Þverfell og Bjarnarvatn frá hlíðum Torfdalshryggjar...

Torfdalshryggur... tindur fimm af níu...

Grímmannsfellið séð frá tindi Torfdalshryggjar...

Esjan...

Eini kaflinn nánast þar sem enginn stígur var... hér lét ég landslagið ráða með stefnuna á efsta tind Grímmannsfell og enginn stígur var sjáanlegur fyrr en efst við tind þess...

Bláfjöll og félagar... mjög áhugavert að sjá landslagið neðan við Grímmannsfellið hér nær á mynd... dalverpið eða dældina þarna grænu sem dæmi...

Hengillinn...

Líklega meiri þurrkur en oft áður...

En pollar á ólíklegustu stöðum... Batman er mjög góður í að þefa þá uppi... þarf meira aðgengi að vatni eftir aðgerðina og er naskur á þessa...

Tindurinn á Grímmannsfelli í augsýn... þessi kafli var mjög langur og sá eini þar sem ég fann til óþreyju...

Komin á stíg efst í Grímmannsfelli... þessi stígur liggur svo niður um syðri öxl fellsins...

Þennan stíg hefði ég átt að fara svo aftur til baka af tindi Grímmannsfells... frekar en að fara norðuröxlina... enda l eiðrétti ég mig stuttu eftir að ég var komin áleiðis niður hann..

Tindur sex... Grímmannsfell... hæsti punktur dagsins... í 496 m hæð...

Komin "út í enda" á hringleiðinni.... og nú var að snúa við og koma sér "til baka" um Reykjafell, Æsustaðafjall og Helgafell í Mosó...

Geldingatjörn (varasamt að fara hringleið þar um og betra að taka hring um Leirvogsvatn sem við hringum reglulega á þriðjudagsæfingu...

Niður af tindi Grímmannsfells fer ég svo um slóðann á norðuröxlinni þar sem við höfum farið hana nokkrum sinnum áður… en átta mig fljótleg á því að auðvitað lá mun beinna við að fara niður suðuröxlina þar sem hún lá svo í beinni línu að Reykjafellinu sem var hæsta fjall á leiðinni…

Ég sneri því til suðurs af stígnum og stefndi á stíginn sem ég sá að lá um suðuröxlina… og var ekki lengi að leiðrétta þessa vitleysu í mér… ef einhver eltir gps-slóðina mína, þá sem sé þarf að passa þetta, að fara niður af Grímmannsfelli á stígnum sem er sunnar…

Komin á stíginn í suðurhluta Grímmannsfells...

Litið til baka... tindur Grímmannsfells vinstra megin...

Bjarnarvatn úr suðurhlíðum Grímmannsfells...

Ofan af Grímmannsfelli var þessi fíni stígur niður frekar brattan kafla… ég var að sjá þennan stíg í fyrsta sinn og gladdist mjög yfir að uppgötva nýja og mjög skemmtilega leið á Grímmannsfell…

Litið til baka...

Hér var iðandi sumrið rennandi beint í æð... hvílí forréttindi að vera hér frekar en á malbikinu innan um steinsteypt húsin í grámanum í borginni með bensínlyktina í vitunum...

Komin niður og framundan var stígur... alla leið á Reykjafellið... ótrúlegt... þetta kom mér mjög á óvart... Mosfellæingar standa sannarlega fyrir sínu...

Á þessum kafla er mýrlent og það reyndi vel á skóna og útsjónarsemi við að sniðganga verstu bleytuna… hér er betra að vera vel skóaður… allir utanvegaskór blotna strax á þessum kafla en ökklaháir fjallgönguskór geta vel haldið… en svo ræður veðurtíðin auðvitað öllu hvern dag…

Hér áðum við Batman í annað sinn á göngunni... við friðsælan læk... ómetanleg stund...

Seinni samlokan... haha, það er gott að vera ekki með þráhyggju fyrir nestinu...

Komnir tæpir 19 km á tæpum 5 klst....

Litið til baka upp brekkuna góðu á Grímmannsfelli...

Reykjafellið framundan...

Reykjafellið... sjöundi tindurinn af níu... 22 km á 5,5 klst....

Æsustaðafjall framundan... ég eltist við stíginn eins og hægt var en ekki alveg þar sem ég stytti aðeins á milli...

Hér verður síminn rafmagnslaug því miður... og engar myndir voru teknar af leiðinni yfir á Æsustaðafjall sem var áttunda fjallið... né yfir á Helgafellið í Mosó sem var níunda og síðasta fjallið á þessari hringleið en þar fann ég fínstu leið í gegnum hverfið og Varmá… en þó ber að vara við kaflanum utan í Helgafellinu þar sem þræða þarf ofan við hestagerðin í suðurhlíðunum og gæta að friðnum þar…

Mögnuð hringleið sem koma virkilega á óvart og var miklu meira á stíg en ég átti von á og án allra hindrana að ráði fyrir utan kannski hestagerðin í lokin og svo hverfið en það gekk samt mun betur fyrir sig en ég átti von á.

Alls 30,2 km á 7:50 klst. upp í 496 m hæð með 1.346 m hækkun alls.

Var örþreytt eftir þennan túr en hann lifði sterkt í minningunni allt sumarið og leiðin kallaði stöðugt á mann… þetta var eitthvað sem ég vildi upplifa með Toppfarahópnum… svo við munum setja þessa leið á dagskrá við tækifæri á næsta ári 2026…

Þessi leið er áskorun fyrir þá sem vilja sjá hvernig þeir þola yfir 30 km gönguleið… og hún er stórkostlegur sigur fyrir alla sem klára… hún hentar vel þeim sem vilja eyða tímanum í göngu en ekki akstur… og hún hentar mjög vel þeim sem vilja geta hætt við á miðri leið og hringja og láta sækja sig sem er auðvelt að gera á milli fjalla á þessari leið…

Einstakur dagur sem stendur upp úr flestu sumarið 2025…

Gps-slóðin hér: Wikiloc | Níu tindar Mosó - hringleið á níu fell 280625 Trail

Myndbandið hér: Níu tindar í Mosó 31 km hringleið