Blækyrrð og lognværð á Hafrahlíð og Reykjaborg
- Bára Agnes Ketilsdóttir
- Nov 14, 2025
- 2 min read
Æfing nr. 837 þriðjudaginn 11. nóvember 2025
Árið 2025 fannst moskítóflugan í fyrsta sinn á Íslandi... ekki skrítið... í öllu þessu logni... og erum við nú ekki að kvarta... en það liggur við að við kunnum ekki lengur á vindinn... slíkt er hið lygna veður vikum og mánuðum saman meira og minna þetta árið... og finnst þjálfara þetta búið að vera svona síðustu tvö ár eða svo... en þó í mesta mæli nú, árið 2025...
Dagskráin miðast við erfiðan vetur sem hefur verið reynslan svona allavega aðra hverja þriðjudagsgöngu... stundum margar í röð... en nú er blíðskaparveður þriðjudag eftir þriðjudag... og því eru æfingarnar hálf léttar að okkur finnst... en yndislegar...
Mía er nýjasti Toppfarahundurinn... hún stendur sig með prýði og er algert ljós... en Siggi er að venja hana við fjöllin og félagsskap hunda og mann og það gengur vel... hér komin í bakpokann sem Siggi er með fyrir hana þegar vindurinn mætir eða aðstæður verða of erfiðar fyrir þessa litlu en dásamlegu písl...
Alls mættir 14 manns: Þorleifur, Örn, Siggi, Brynjar, Ragnheiður, Linda, Silla, Björg, Halldóra Kr., Hermína sem var að mæta í sína fyrstu göngu og rúllaði þessu upp, Guðjón, Hjörtur og Bára tók mynd en Batman og Ch voru þarna með líka...
Önnur orð... yfir lognið... sem tröllríður árinu 2025... íslenskan á skilið... að við leitum fanga hjá henni... og engum öðrum tungumálum... #áframíslenska
... og hvert orð hér fyrir neðan... á skilið heila línu... hvílík orðasmíð... hvílík gnægð... hvílíkur fjársjóður... á bak við hvert orð var sköpun einhvers... hugsun í lausnum... um hvernig ætti að koma orðum að því sem er... logninu... í veðrinu...
... þjálfari lofar að nota þessi orð hér fyrir neðan hér með... og hætta að skrifa alltaf einungis "logn"... við getum þetta... enga leti... nýtum þetta ríka og fjölbreytta tungumál okkar... íslenskan á það skilið...
Álablíða
blankalogn
bláalogn
blálogn
blíðalogn
blæjalogn
blækyrrt
blælygn [kvöld, nótt]
dauðalogn
dúnalogn
froststilla
glampandi logn
hann blálygnir
hann dúrar
hann gerir <logn>
hann hreyfir ekki vind
hann hægir
hann lygnir
hann lægir
hann sléttlygnir
hitastilla
hvítalogn
í blíða logni
í blíðalogni
í blæja blíða logni
í blækyrru veðri
í dúnalogni
í hvítalogni
í koppalogni
í kyrralogni
í logni
í rjómalogni
í stillilogni
koppalogn
kyrra
kyrralogn
kyrrur
ládeyða
lognblíða
logn er veðurs
lognfrost
lognhvítur [dagur]
lognkyrr
lognkyrra
lognkyrr [dagur, kvöld, nótt]
lognmolla
lognstilla
logn um allan sjó
lognveður
lognviðri
lognvær
lognvær [dagur, kvöld, nótt]
lognværð
lygna
lygnt
lygnt veður
lygn [veður]
renniblíða
rennilogn
rjómablíða
rjómalogn
selalogn
sléttalogn
spegillogn
speglandi logn
stafalogn
stilla
stillilogn
stillulogn
stillur
<storminum> er í logn slegið
svartalogn
<veðrið; storminn> lygnir
<veðrinu> slær í logn
vetrarstilla
vindlaust loft
vindleysa
Vá ! Hvílíkur snilldarinnar listi úr smiðju Árnastofnunar !
Æfingin reyndist alls 5,1 km á 1:43 klst. upp í 253 m á Hafrahlíð og 288 m á Reykjaborg með alls 274 m hækkun úr 73 m upphafshæð...
Ef klukkunni verður seinkað um klukkutíma... þýðir það myrkur á þó nokkuð fleiri þriðjudagskvöldum en nú er... og minni birtu almennt... og lægri sól almennt á öllum þriðjudagsæfingum... vonandi raungerist það ekki...
Hleðsla á jákvæðri orku, þakklæti, hugljómun, auðmýkt, lærdómi, vinsemd, virðingu, hjálpsemi, samstöðu... og fjölda fleiru... þessar göngur eru ómetanlegar... verum þakklát númer eitt ;-)
Comments